Help!  Ek kom nie uit met my salaris nie

deur Ansja Ferreira

Sak jou moed in jou skoene wanneer betaaldag nader kom?  Die wete dat jou pas inbetaalde salaris binne die eerste week opgeslurp gaan word deur aftrekorders, rekeninge, skuld, onvoorsiene uitgawes en die volgende betaaldag so ver voel.  Sit jy met jou hande in jou hare as jy weet dat jy nie deur die maand gaan kom met jou salaris nie? Jy is nie alleen in hierdie verknorsing nie.

 

Finansiële dissipline en ‘n eenvoudiger leefstyl

“‘n Mens hoor dikwels hoe mense kla dat hulle nie met hulle geld kan uitkom nie en dat hulle alewig in die skuld is. Tog verdien baie van hierdie mense ‘n redelike goeie salaris, maar hulle weet nie hoe om met hulle geld te werk nie, sê Connie Bruwer, ‘n geoktrooieerde rekenmeester.

“Finansiële dissipline is belangrik. Die beste voorneme wat ‘n mens kan hê, is om minder skuld te maak en op jou uitgawes te besnoei sodat jy nie kort voor lank in ‘n groot penarie beland nie.  Begroot is die woord,” sê Connie.  “Spaar elke maand.  Probeer om in jou begroting voorsiening te maak, om elke maand ‘n vaste bedrag te spaar.  Jy sal verbaas wees hoe vining jou spaargeld sal groei,” sê hy. Connie gee die volgende raad:

 Hou boek

Kry ‘n boek waarin jy al jou uitgawes neerskryf en kyk aan die einde van die maand daarna. Nou sal jy maklik kan agterkom hoeveel jy moet begroot vir kos, klere, ontspanning, telefoon, petrol en al die ander dinge wat ‘n mens nodig het. (Jy kan ook op ‘n rekenaar als aanteken en byhou).

Kredietkaarte: In die eerste plek moet mense oppas vir kredietkaarte en ander vorms van skuld maak. As jy jou kredietkaart gaan gebruik, gaan jy uiteindelik veel meer betaal vanweë die hoë rente. Baie mense het meer as een kredietkaart, of ‘n krediet-en ‘n petrolkaart. Indien jy nie jou kaartrekeninge kan betaal nie, selfs nie eens deur jou spaargeld te gebruik nie, is dit tyd dat jy jou geldsake weer bekyk. Laat liewer al die skuld oorplaas na dié kredietkaart waarvan die rentekoers die laagste is. Jy betaal dus nou net een bedrag per maand om jou verskillende rekeninge te vereffen (wat jou al klaar beter sal laat voel) en jy het boonop die goedkoopste een gekies. Raak ontslae van jou kredietkaart indien jy jou nie kan dissiplineer om net ‘n sekere bedrag per maand uit te gee nie.

Ken jou beperkings: Dit is dikwels die geval dat mense bo hul vermoëns probeer leef, net om nie by hul bure of vriende af te steek nie. Het jy regtig daardie duur, nuwe motor nodig of kan jy vir nog ‘n paar jaar met jou bestaande motor regkom? Is al daardie luukshede werklik nodig. Wie wil jy dan graag beïndruk? Is al daardie luukshede die moeite werd as jy nagte gaan wakkerlê van al die skuld wat jy gemaak het en jare gaan sukkel om dit afbetaal te kry?

Geskenke en aankope: Maak ‘n lys van almal vir wie geskenke gekoop moet word – so sorg jy dat jy nie op die nippertjie ten duurste by die apteek of die geskenkwinkel moet gaan aanklop nie. Begroot hoeveel geld jy aan elke persoon gaan bestee en hou daarby. Vra jouself af of jy ‘n item werklik nodig het voordat jy dit in jou mandjie sit. Moenie meegesleur word en halsoorkop begin koop nie. Hou by jou inkopielys. Dink mooi voordat jy gaan geld trek by die kitsbank. Dit help net mooi niks as jy vandag net genoeg geld trek vir dit wat jy vandag nodig het, as jy weet jy moet môre petrol ingooi en haarkapper toe gaan. Trek eerder die ekstra geld en bêre dit op ‘n veilige plek, sodat jy dit môre kan gebruik. Anders betaal jy bankkoste vir twee onttrekkings in plaas van net een.

Geriefskaarte: Kyk ook mooi of die gerieflikheid van byvoorbeeld ‘n garagekaart werklik die moeite werd is. Byvoorbeeld: as jy ‘n garagekaart het, betaal jy heel waarskynlik R250 per jaar vir die voorreg, sowel as ongeveer R10 per keer wat jy dit gebruik. Jy kan soveel as R500 ‘n jaar bespaar deur nie ‘n garagekaart te hê nie.

Vergelyk op opsies:

Vergelyk jou opsies vir mediese fondse, versekering, lewensversekering, gimnasiumkontrakte, selfoonkontrakte ensovoorts. Kry kwotasies by elkeen en vergelyk die voordele en kostes daaraan verbonde.  Deur die beste opsie in elke geval te kies kan jy baie geld spaar.

Gee aandag aan jou testament en boedelbeplanning

Is jou testament en boedelbeplanning in orde?  Indien nie, gaan spreek ‘n kenner om jou te help.

Betaal meer af op jou verband betaling as wat jou paaiement is.

“Vir baie mense kan dit dalk traumaties wees om oor te skakel na ‘n eenvoudiger leefstyl, maar as mens weet dat daar wêreldwyd oor hierdie onderwerp gedink en geskryf word, is dit dalk iets om weer oor te dink en eintlik opgewonde oor te raak, sê Connie.

Connie stel ‘n paar idees voor om jou maandelikse uitgawes te verminder en eenvoudiger te leef:

* Koop ’n kleiner huis. Dit is duur om ’n groot huis en ’n groot tuin in stand te hou en om so ’n huis te verwarm.

* Ry ’n goedkoper motor, want ’n goedkoper maar betroubare motor is gewoonlik ligter op brandstof.  Deesdae het die meeste motors, selfs met ’n enjin van 1600 cc, baie luukshede in en hoef jy dus nie te voel jy is slegter daaraan toe as jy ’n goedkoper motor ry nie.  Baie mense is bereid om presies dit te doen as so ’n opoffering beteken dat jy meer gereeld gholf kan speel of meer met vakansie kan gaan.

*Laat staan die duur TV-diens. Daar is goedkoper alternatiewe wat ook jou gunstelingprogramme aanbied.

* Rente. Knip die kredietkaart middeldeur of sorg dat jy dit elke maand ten volle aflos.

* Betaal jou kar in drie jaar af. Betaal ekstra geld tot jou beskikking op jou huis af. Jy kan sodoende in ’n dekade of wat honderdduisende rande aan rente spaar.

* Moet niks koop wat jy nie werklik nodig het nie.  Koop vir jou kinders ‘n eenvoudige selfoon sonder al die truuks, kameras en bykomstighede.

* Moenie skuld maak nie. Dit maak dat jy later nog harder moet werk net om die skuld terug te betaal en jy kan dus nie die belangrike goed in jou lewe geniet nie.

* As jy al dié dinge doen, kan jy dalk ’n eenvoudiger werk “bekostig”.’n Werk wat dalk minder stres tot gevolg het en ook meer tyd bied om te gaan stap of draf of gholf te speel – iets wat jou lewenstyl kan verbeter sonder dat dit jou ’n fortuin hoef te kos.